LEGAZPI CITY-Naglansar an mga otoridad nin sarong mahiwas na search and rescue operation makalihis na labi sa 20 katawo an ibinareta na nawawara huli sa matinding pagbaha sa Grand Canyon sa Arizona.
An aksidente nangyari pagkatapos na an sarong makusog na monsoon storm an haros nagdara nin sarong pulgada nin uran sa laog sana nin 30 minutos, na marikas na nagkawsa nin makusog na sulog nin tubig, laboy, asin mga gapo sa kahalabaan kan Bright Angel Creek asin Phantom Ranch.
Labing 60 na mga hikers asin mga residente an ligtas na naibakwit hale sa apektadong lugar sa tabang kan National Park Service asin kan Arizona Department of Public Safety.
Sadyang winasak kan tubig baha an kadaklan sa mga tulay sa lugar, na nagin dahelan kan temporaryong pagsara kan Phantom Ranch, Bright Angel Campground, asin kan North Kaibab Trail.
Padagos an pakikoordinar kan mga rescuers sa American Red Cross ngani na matawan nin first aid an mga apektadong pamilya mantang pighahanap an mga nawawarang indibidwal.
An Flood Watch nagtetenir na epektibo para sa north Arizona huli sa huma nin dugang pang mga uran na pwedisir magkawsa nin dugang pang pagbaha asin pagrasay nin daga sa mga bangin.
