LEGAZPI CITY- Pinaghahanap pa sa ngonian kan Aroroy Municipal Police an limang suspek sa panhoholdap sa sarong bus sa Brgy. Dayhagan sa provincia kan Masbate.
Susog sa inisyal na imbestigasyon kan mga otoridad, sarong bus na igwang markang “Emmanuel” na lunad an nasa 39 pasahero an pasiring sa national road kan nasabing lugar kan biglang papunduhon kan limang armadong suspek.
Nagdeklarar an mga ini nin hold-up saka naghuma sa mga pasahero na kukulugan an mga ini kun da
e itatao an mga kwarta asin importanteng mga gamit na nasa poco mas o menos P60,000 sa kabilugan.
Tulos man na nagdulag an mga suspek dara an mga nilalay na gamit pasiring sa kabubuldang porsyon kan lugar.
Napag-araman na duwa sa mga nasabing suspek partikular na sinda Joshua Tumlod, 22-anyos asin Teddy Tumlod, 35-anyos an puga pa sa Masbate Provincial Jail mientras na kaibanan man si Jomar Tumlod, 25-anyos asin dae pa nabibistong duwang persona.
Sa presente, nagpapadagos man an ipigsasagibong pursuit operation kontra sa nasabing mga suspek.
