LEGAZPI CITY- Pigkakarkulong labi sa P300, 000 na kantidad kan pigtutubudang shabu an nakumpiskar kan mga operatiba kan Philippine Drug Enforcement Agency (PDEA) asin iba pang law enforcement units sa magkasuway na operasyon sa Albay.
Sa nagunong impormasyon kan Bombo Radyo Legazpi, enot na isinagibo an pagsisirbe nin search warrant bandang alas-9:05 kasubanggi kontra ki Marvin Sevillano alyas “Gaus” sa Purok 2 Brgy. Sabang kan Legazpi City.
Nakumpiskar sa nasabing Provincial Target an poco mas o menos 40 gramo kan suspected shabu o may market value na P240,000.
Matrayumpo man an pagsisirbe kan search warrant kontra ki Antonio Alejo alyas “Anton” sa parehong lugar bandang alas-10:45 makalihis na marekober an nasa 20 gramo kan pigsasabing shabu na nagkakantidad nin P120,000.
Sa presente, nasa kustodiya na an mga ini kan PDEA mantang pighahalat an inquest proceedings sa kakahampangon na magkakanigong kaso.
Mientras tanto, ipighayag ni PDEA Bicol public information officer Dir. Gil Castro sa Bombo Radyo Legazpi an dagos-dagos na intelligence based asin operation-oriented activities tangarig na mapuho an illegal drugs sa rehiyon urog na kaibanan an lugar sa Top 3 regions kan Pilipinas na noted sa “darakulang dakop” kan drug personalities. V
