LEGAZPI CITY – Kinumpirmar kan Philippine Army an insidente nin engkwentro sa pagultanan kan puersa kan kapulisan asin pigtutubudang New People’s Army (NPA) members sa Brgy. Tula-Tula Sur, Magallanes, Sorsogon kasuodmang hapon.
Sa ekslusibong intrevista kan Bombo Radyo Legazpi ki 9th Division Public Affairs Office (DPAO) Chief Major Ricky Aguilar, nagsasagibo nin test mission an mga miembro kan PNP Special Action Force (SAF) sa banwaan kan maka-enkwentro an mga rebelde.
Nagresulta an insidente sa pagkairido kan duwang SAF member na binistong sinda Patrolman Abdullajid Anni asin Patrolman Kenneth Bautista.
Sa ibong na lado, dae pa man maaraman sa ngonian kun igwa man na nairido sa mga pigtutubudang NPA.
Magin an pulisya an wara pa man na ipigpapaluwas na detalye katakod kan insidente mantang nagpapadagos pa nin imbestigasyon.
Mientras tanto, naglunsar naman nin hot pursuit operation an militar sa posibleng pagkakaarestar kan mga responsable sa insidente.
