LEGAZPI CITY — (UPDATE) Ibinuyagyag kan Philippine Drug Enforcement Agency (PDEA) Albay na an mga nadakop na durugista sa Barangay Oro Site ciudad kan Legazpi an saro sa mga darakulang supplier nin droga sa provincia.
Sa intrevista kan Bombo Radyo Legzapi ki PDEA Agent Enrique ‘King’ Lucero, an mga suspek na sinda Ismael Onsad alyas Opaw asin Angelo Ariraya alyas Angel an haloy ng pigmomonitor kan ahensya antes pa man an entrapment operation.
An mga pangaran kan duwa man an nagluluwas sa mga pahayag kan mga enot ng nagkadarakop na drug personality na suboot nagsusupply kan droga sa sainda. Puon kaini, pigsubaybayan na suboot ninda an mga iligal na aktibidad kan duwa na may kinaaraman sa pagpapabakal asin pagsasaray nin iligal na droga.
Kun babalikan, nakumpiska ki Ariraya an poco mas o menos 150 gramo nin shabu mantang haros sarong kilo nin pigtutubudang shabu an nakua ki Onsad na pigkakarkulong maabot sa P6.9 milyon an kabilugang kantidad.
Sa ngonian, may saro pang pigmo-monitor an PDEA-Albay na saro pang source kan droga alagad wara suboot ini ngonian sa provincia.
Dugang pa ni Lucero, kakasuhan nin pagbalgar sa Section 5 kan Republic Act 9165 o Comprehensive Dangerous Drugs Act o an pagpapabakal nin droga asin Section 11 o an pagsasaray nin droga an duwang suspetsado.
Nangapudan pa an opisyal na padagos na suportaran kan publiko an kampanya kontra droga asin isumbong sa ahensya an anumang nanonotarang iligal na aktibidad na may kinaaraman sa droga.
