LEGAZPI CITY — Kumpirmadong gadan an sarong miyembro kan rebeldeng New People’s Army (NPA) o an pig-aapod ngonian na teroristang grupo base sa iniluwas na Presidential Proclamation makalihis an nangyaring bakbakan sa tropa kan gobierno sa provincia kan Sorsogon.
Nakaengkwento kan sarong scout platoon kan Headquarters & Headquarters Company, 31st Infantry Battalion Philippine Army an poco mas o menos 30 miembro kan NPA mantang nagsasagibo an mga ini nin combat strike operation sa Barangay Salvacion, banwaan kan Magallanes bandang alas 11:30 nin aga kasubago.
Nagdurar nin 30 minuto an ribayan nin putok kun sain nangenot sa lado kan kalaban si Edwin Dematera alyas Ka Dupax. Makalihis ini tulos man na nagdulag an mga terorista pasiring sa Barangay Biton sa parehong banwaan.
Narekober man kan mga otoridad an duwang high powered firearm. Wara mang nairehistrong nalugadan o nagadan sa tropa kan gobierno mantang saro man an gadan sa kalaban.
Mientras tanto bandang alas 11:50 kasubago nagkaigwa man nin engkwentro sa Barangay Somagongsong, banwaan man kan Bulan kun sain nagkahampangan an Charlie Company, 31st IB Philippine Army asin pigtutubudang terorista na lunad kan gray L300 van.
Segun sa Bulan Police, nagsasagibo nin checkpoint an tropa sa nasabing lugar kan biglang paputukan kan lunad kan uminaging van asin nagbaba pa an mga ini. Wara man na nalugadan o nagadan sa parehong lado.
Katakod kan magkasunod na engkwentro, nakaalerto an gabos na istasyon kan pulisya asin nagkokondusir nin man checkpoint/blocking force sa gabos na strategic locations.
Padagos man an piggigibong monitoring sa mga coastal areas asin mga ospital ngani maderipika kun may ma-admit na pasyenteng may tama nin bala.
Mientras tanto sa pakikipag-olay ta sa Bulan Police asin Magallanes Police, sinabi kan mga ini na padagos an saindang paghahanap sa mga terorista kun sain kan paduman an mga ini sa bulod na posibleng tinaguan kan mga NPA.
