LEGAZPI CITY—Nakapagrehistro nin duwang insidente nin pagkalamos an mga otoridad durante kan pag-obserbar kan Undas sa rehiyong Bicol.
Segun ki Coast Guard District Bicol Public Information Officer Coast Guard Ensign Alyzza Novie Bermal, sa intrevista kan Bombo Radyo Legazpi, nairehistro an nasabing insidente sa Naga City, Camarines Sur asin Daet, Camarines Norte.
Dugang kan opisyal na sainda pang pig-iimbestigaran kun kaiba sa mga nairehistrong drowning incident ngonian na Undas an nangyari sa San Andres, Catanduanes.
Mientrastanto, sinabi man ni Bermal na nakapagrehistro man sinda nin kabilogang labi 18,000 outbound passengers asin labi 15,000 inbound passengers puon kan October 30 sagkod November 3 sa mga pantalan sa Bicol.
Pighayag man kan opisyal na maabot man sa 500 deployable response teams kan saindang opisina an nakapreparar huli sa huma kan bagyong Tino sa rehiyon.
Huli man sa bagyo an nakapagrehistro man an nasabing ahensya nin nasa 2,000 stranded na mga biyahero, 3 stranded na vessel, 543 stranded rolling cargoes sa manlaeng-laeng pantalan kan Bicol.
Abiso man ni Bermal sa publiko na magin mapagmatyag, magsunod sa mga advisories, ibitaran an pagbarewas nin bako beripikadong impormasyon asin ibitaran muna an paglawod sa mga kadagatan, siring na makipagkoordinar sa saindang opisina en kaso may mga emerhensya.
