LEGAZPI CITY- Kinumpirmar kan pamilya ni Miss Universe 2018 Catriona Magnayon Gray na magkakaigwa nin grand reunion an pamilya bako sana sa provincia kan Albay kundi sa Manila makalihis an trayumpo kan 24-anyos na Bicolana beauty.
Sa ekslusibong intrevista kan Bombo Radyo Legazpi ki Salve Ragas Dineros, lola ni Catriona sa Oas, Albay, wara pa man suboot nin kongkretong petsa kun nuarin itatalaan an nasabing okasyon alagad sierto na suboot an pag-iiribanan kan bilog na angkan.
Segun ki Lola Salve, 80% kan mga parientes an nasa Manila na kaya duman muna obheto na gibuhon an grand reunion mantang liwat na magkakaigwa nin pagtiripon an mga ini sa Albay.
Ipig-oorgulyo kan bilog na Ragas-Magnayon clan an trayumpo ni Catriona kaya pinag-oolayan na an piglulutong aktibidad na ibabase sa magigin schedule kan beauty queen na susog sa pagtugot kan Miss Universe Organization (MUO).
Sa ibong na lado, posibleng isabay na sana suboot an importanteng okasyon sa magigin homecoming ni Catriona.
