Duwang persona na an binawian nin buhay mantang anom na iba pa an irido sa nangyaring pambabadil sa laog kan Florida State University.
Segun ki Florida State University Chief of Police Jason Trumbower na naarestar na an suspek makalihis na mabadil man kan kapulisan na nagresponde sa insidente, asin nagpaparahay na sa ospital.
Binisto an suspek na si Phoenix Ikner, 20-anyos asin aki kan sarong Leon County sheriff deputy.
Basado sa imbestigasyon na posibleng kinuwa kan suspek an badil sa pinagtatrabuhan kan ina sa Leon County Sheriff’s Office.
Pig-aaram pa kan mga otoridad an mobito sa nasabing pambabadil.
Sinierto man ni Florida State University community President Richard McCullough na papaabutan nin tabang an mga nagadan asin nairidong biktima.
