LEGAZPI CITY– Duwa an kumpirmadong gadan mientras na tolo an nairido sa nangyaring pagpapasabog asin ribayan nin mga putok sa banwaan kan Viga, Catanduanes sa pagultanan kan mga pulis asin pigtutubudang miembro kan New People’s Army (NPA) partikular na sa Brgy. Sagrada.
Sa ipinaabot na impormasyon ni Police Regional Office 5 (PRO5) spokesperson S/Insp. Malu Calubaquib, napag-araman na lunad kan duwang mobile kan pulisya an mga personahes kan Viga Municipal Police na binistong sinda SPO1 Marwin de Vera, PO3 Quirico Orteniro, PO1 Rousner Carbonel, asin PO1 Bryan Magalong kaibanan an nasa poco mas o menos 10 drug surenderees asin pigbabaybay an national road sa parte kan Brgy. Sagrada sa nasabing banwaan kan sa pag-abot kan mga ini sa lugar na harani sa sarong resort, nasagi kan saro sa mga mobile an nakatanom na improvised explosive device (IED) na causa kan makusog na pagsabog.
Tulos man na ipinaabot ni PO1 Magalong an impormasyon sa hepatura kan Viga MPS kun kaya ipinadara bilang responde sinda S/Insp Ernesto Montes, SPO2 Bienvinido Trinidad, PO1 Eva Torcilino, asin SPO1 Erwin Pichuela.
Sinundan pa ini kan ribayan nin putok sa pagulatanan kan kapulisan asin poco mas o menos 20 miembro kan NPA.
Nagresulta an insidente sa pagkagadan kan duwang pulis na binistong sinda PO1 Torcilino asin PO3 Joseph Tupue mientras na irido man sinda SPO1 Marwin de Vera asin S/Insp. Ernesto Montes Jr. siring man an duwa pang drug surrenderees na idinalagan na sa ospital asin pigtatawanan na nin medikal na asistensya.
Nagpapadagos pa man an pursuit operations sa nasabing lugar.
