LEGAZPI CITY — Gadan an duwang katawo mantang irido an tulong iba sa banggaan nin apat na motorsiklo sa banwaan kan Daraga, Albay.
Binawian nin buhay an driver kan ika-apat na motorsiklo na si Norvin Magallon, 34-anyos asin an backride na si Susan Letran Magallon na parehong residente kan San Vicente Grande, Daraga.
Base sa imbestigasyon kan Daraga Police, antes an nasabing banggaan, pasiring sa Sorsogon City si Marlon Arago na taga-Tiaong, Quezon asin pigsusundan nind Adonis Rodrigueza na tubong Caramoan, Camarines Sur asin ni Magallon.
Alagad antes pa man makaabot sa pakurbadang parte kan tinampo, parehong nag-overtake sinda Rodrigueza asin Magallon sa motorsiklo ni Arago na nagresulta sa pagbanggaan sa lambang saro.
Nakasalpok man si Rodrigueza sa saro pang motorsiklo na pigmamanehar ni Onil Llaneta, na pasiring sa Daraga Poblacion.
Tulos man na idinalagan sa ospital an mga biktima alagad idineklarar na dead on arrival an duwang Magallon mantang nagpaparahay na sinda Onil, Rodrigueza asin an bakcride kaini na si Gladys Kim Remolasyon.
Sa ngonian, padagos pa an piggigibong imbestigasyon kan kapulisan sa nasabing insidente.
