LEGAZPI CITY—Gadan an duwang indibidwal mantang nagkapirang indibidwal man an dinara sa ospital makalihis an nangyaring aksidente sa Barangay Balangibang, Polangui, Albay.
Segun ki Polangui Emergency Medical Service – Quick Response Team Supervisor Christopher Encisa, sa intrevista kan Bombo Radyo Legazpi, na basado sa inisyal na report, 24 pasahero kan pampasadang bus an dinara sa ospital mantang duwang indibidwal kun saen an parehong drayber kan truck asin bus an binawian nin buhay.
Susog sa inisyal na imbestigasyon kan mga otoridad na pigbabaybay kan duwang behikulo an magkaibang linya nin tinampo, kun saen an truck an gikan sa Naga City pasiring sa Legazpi City.
Mantang pigbabaybay man kan bus an kabaliktaran na direksyon.
Dugang kan opisyal na segun sa salaysay kan mga pasahero kan bus na puminutok suboot an goma kan truck rason kaya nakapasiring ini sa linya kan saindang piglulunadang bus asin nagkabanggaan.
Mientrastanto, abiso kan opisyal sa mga biyahero na paghilingon an kondisyon kan saindang mga behikulo bago magbiyahe nganing maibitaran an mga siring na aksidente.
