Nagsasagibo na nin masusing imbestigasyon an mga awtoridad sa malagim na aksidente sa motorsiklo na kinas-imbweltuhan kan tulong menor de edad na estudyante sa Barangay Balintawak, Pagadian City, Zamboanga del Sur.
Basado sa report kan Pagadian City Police, duwang estudyante an binawian nin buhay makalihis na makabangga an lunadan nindang motorsiklo sa sarong harong sa gilid kan tinampo.
Binisto an mga nagadan na sinda alyas Joan asin alyas Rhea, parehong 17 anyos asin Grade 11 students kan Zamboanga del Sur National High School.
Nagsapo nin dakulang lugad sa payo an driver kan motorsiklo na si alyas Dan, saro man na senior high school na tulos na idinalagan sa ospital.
Segun sa saiyang pahayag, nagluwas sinda para maglakaw-lakaw sa Pakpalan site huli ta mayo sinda sa eskwelahan.
Kan makababa na naman sinda sa Balintawak highway, nawaran suboot ini nin preno, kaya nabunggo an motorsiklo sa harong kan residente na si Mrs. Jona Sadrino.
Susog sa CCTV footage gikan sa lugar, marikas an dalagan kan motorsiklo asin tuminama an payo kan mga biktima sa kanto kan pwertahan na posibleng naging rason kan tulos na pagkagadan kan mga ini.
Nakatindog si Dan makalihis an insidente alagad nagsapo nin lugad sa pandok.
Nabigla asin nahadit si Dan sa nangyari sa saiyang mga kaklase, orog nang pig-iisip niya kun pano niya ini ipapaliwanag sa mga magurang kan biktima.
Nagpagirumdom an mga otoridad sa publiko na mag-ingat kun magamit nin motorsiklo, urog na itong mga kulang sa supisyenteng eksperyensya asin mayong lisensya, nganing maibitaran an siring na trahedya.
