LEGAZPI CITY — Inasegurar kan DENR Environmental Management Bureau (EMB) na salbado asin malinig an water quality sa Albay Gulf partikular na sa parte kan Legazpi Boulevard makalihis an isinagibong eksaminasyon.
An nasabing waterbody kaya an masirbeng venue para sa duwang darakulang sports events sa Asya partikular na an Asian Paratriathlon Championships asin Mt. Mayon ASTC Triathlon Asian Cup sa maabot na Agosto 10 asin 12.
Sa intrevista kan Bombo Radyo Legazpi ki EMB Bicol Environmental Monitoring and Enforcemernt Division chief Engr. Leonisa Madeloso, napag-araman na mismong an city government an nagrequest kan pag-eksamin kun sain puminasar an kalidad kan tubig sa standards na pigsusunod kaya wara dapat na ikahadit an mga mapartisipar na lokal asin dayuhang atleta.
Mientras tanto, piglalaomang labi sa 15 nacion an mabale sa nasabing kompetisyon na maagi sa 1.5-kilometer swim; 40-kilometer bike route asin 10-kilometer run.
Saro pa sa pinakaabangan an pagsasagibo kan para-triathlon sa ciudad sa enot na bes.
Makakakua man nin mga medalya na gibo sa lava rocks an manggagarana sa race mantang mapapaduman an proceeds kan event sa mga pamilya na naapektaran kan pag-aalburoto kan Mayon Volcano ngonian na taon.
Parte an nasabing kompetisyon kan pagbubukas kan Ibalong Festival na piglalaomang “most scenic tri race” kun saen masirbeng foreground asin backdrop an bulkan mantang “most challenging run” man kan nacion.
