LEGAZPI CITY- Nakatalaan na magsagibo nin duwang aldaw na transport stike an Condor-Pistong Bicol kaibanan an No to Oil Price Hike Coalition sa Setyembre Setyembre 29 hanggang 30 sa presenteng taon.
Mapuon an tigil-pasada nin alas-6 nin aga hasta alas-6 nin banggi.
Segun ki Condor-Piston Bicol President Ramon Rescovilla na nakikipagkoordinar pa sinda sa iba pang grupo ngani na maabot an traget na 95% na paralisado an transportasyon.
Sa presente nakikipag koordinar man suboot sinda sa asosasyon kan mga UV express asin bus ngani na enganyaron an mga ini na makusumaro sa tigil-pasada, huli ta kaibanan sinda sa pinaka apektado kan padagos na paglangkaw kan presyo kan produktong petrolyo.
Sinabi kan opisyal na obheto kan welgang transportasyon na maipangapudan an saindang hinaing na tawan solusyon an padagos na krisis sa langis na nagpapalugmok sa sektor kan transportasyon.
Dagdag pa ni Rescovilla na dapat man na resolbaran kan gobierno an paglangkaw sa sweldo kan mga obrero asin nakakabuhay na ganansya para sa gabos.
Katakakod kaini, nangapudan man nin pagsabot an grupo sa mga commuters na maaapektaran kan saindang aktibidad.
