LEGAZPI CITY — Pinunan na an ika-19 edisyon kan international sailing competition na Philippine Hobie Challenge sa provincia kan Sorsogon.
Sa intrevista kan Bombo Radyo Legazpi ki Sorsogon Provincial Tourism Officer Bobby Gigantone, nasa 150 mga partisipantes an nakisabay sa aktibidad kung sain 16 an hale pa sa ibang nacion.
Nagin matrayumpo man an primerong aldaw kan kompetisyon maski na inabot nin labi sa 10 oras an paglayag kan mga sailors huli sa kulang na paros sa dagat.
Napag-araman na pinunan an sailing event nin alas 8:00 nin aga hale sa kadagatang sakop kan Donsol pasiring sa Matnog, alagad alas 7:00 na nin banggi kan makaabot an mga partisipantes.
Mientras tanto, bilang parte kan outreach program kan nasabing aktibidad nagbariwas nin mga school supplies, solar panel asin water filter bottles sa Pangpang Elementary School.
