LEGAZPI CITY—Nadukayan na wara nang buhay an sarong lalaki na nai-report na missing person sa ikinundusir na search operation kan mga otoridad sa Legazpi City.
Magigiromdomang enot nang nai-report na nawawara an 19-anyos na lalaki, child with special needs, asin residente san Purok 1 Barangay 15 Ilawod East Legazpi City kan Miyerkoles, Nobyembre 19, 2025, kun saen posible suboot na nahulog o inanod ini sa may salog harani sa saindang residencia.
Segun ki Bureau of Fire Protection Legazpi Senior Inspector Joeres Oyardo, sa intrevista kan Bombo Radyo Legazpi, tulos na nagpasiring an Special Rescue Force kan saindang ahensya makalihis makaresibe sindang report na may nagpapataw-pataw suboot na indibidwal sa Barangay Lamba kan nasabing ciudad.
Nahiling soboot ini kan duwang lalaki mantang sinda naglalawod sa kadagatan kan nasabing barangay.
Dugang kan opisyal na kinumpirmar man kan kaparientes kan biktima na ini an saindang pighahanap na nawawarang persona.
Sa presente, pig-iimbestigaran na kan mga otoridad an nasabing pangyayari.
Mientrastanto, abiso man kan opisyal sa publiko na bantayan an saindang mga aki orog na an may mga special needs nganing maibitaran an siring na insidente.
