LEGAZPI CITY—Gadan an sarong 19-anyos na lalaki makalihis na malamos ini sa sarong sapa sa Sitio Bliss, Brgy. Cabraran, Jovellar, Albay.
Segun ki Jovellar MPS COP PCPT Rufino Casagan, sa intrevista kan Bombo Radyo Legazpi, na may naresibi sindang apod gikan sa sarong concerned citizen mapadapit na nasambitang insidente.
Tulos man ining nirespondehan kan saindang mga kapulisan siring man kan Bureau of Fire Protection asin mga opisyales kan barangay.
An biktima binistong na si John Kirby Mujar, 19-anyos, asin residente kan Brgy. Anoling, Camalig, Albay.
Susog sa salaysay kan mga kairiba kan biktima, na sinda nasa impluwensya nin bugsok na likido kan nangyari an insidente.
Alagad kan pahali na sinda sa lugar, napag-araman ninda na biglang naglukso an biktima sa sapa asin baka dae kaini aram na may iba pang nangyari sa saiyang lawas.
Dugang pa kan opisyal na kan paglukso kan biktima dae na ini nahiling kan saiyang mga kairiba huli na man soboot kan mga nagpapataw-pataw na lumot sa tubig.
Dinara pa an biktima sa ospital alagad dae na ini naisalbar pa.
Mientrastanto, ini na an ikaduwang nairehistrong insidente nin pagkalamos na kawsa kan pag-inom nin arak sa nasambitang banwaan ngonian na taon.
