Uminabot sa 19 na aftershocks an nairehistro makalihis an magnitude 4.6 na linog na nagyugo sa Quezon asin iba pang parte kan Luzon kan Lunes, segun sa Office of Civil Defense (OCD).
Sa pahayag kan OCD, sinabi kaini na siyam sa mga aftershock an “na-plot” o nairehistrong may lokasyon, mantang saro sana an namatean kan mga residente.
An mga aftershock an may kusog na poon magnitude 1.4 hasta 3.6.
Magigirumduman na nangyari an linog bandang 12:17 nin udto kan Lunes asin may epicenter sa rayong 24 kilometro hilagang-kanluran kan banwaan kan General Nakar, Quezon.
Namatean ini magin sa pirang parte kan Metro Manila.
Segun sa OCD, wara mang naireport na danyos sa General Nakar asin mga kataraid probinsiya sa Calabarzon.
Dugang pa digdi, ligtas an mga main dam arug kan Angat, Bustos, asin Ipo Dams sa Bulacan, Caliraya Dam sa Laguna, asin Pantabangan Dam sa Nueva Ecija, batay sa paenot na inspeksiyon.
Pig-asigurar man kan OCD na padagos an koordinasyon kan mga regional disaster risk reduction and management councils sa Metro Manila, Central Luzon, Calabarzon asin Mimaropa nganing masyerto an kaligtasan kan publiko.
