LEGAZPI CITY—Irido an 18 indibidwal makalihis an mangyaring aksidente nin behikulo sa Sitio Omagom, Barangay Gulang-Gulang, Irosin, Sorsogon.
Segun ki Irosin Municipal Police Station Investigator Police Staff Sergeant Joemel Alama, sa intrevista kan Bombo Radyo Legazpi, na parehong pigbabaybay kan sarong backhoe asin van an direksyon pasiring sa Irosin proper.
Alagad kan nagmamaniobra na sa outermost lane kan tinampo an backhoe, biglang nagduro-diretso an van rason kun nata nakabangga ini sa likod kan backhoe.
Segun sa opisyal na totally damaged an hampang kan nasabing van asin wara man na nadamay na ibang behikulo sa insidente.
Maabot sa 18 indibidwal an nairido kun saen nagtetenir pa an iba digdi sa ospital mantang an iba na-discharge na.
Mientrastanto, abiso kaini sa mga motorista na kun makamati nin pirot dapat na magpahingalo muna urog na kun harayo an saindang biyahe.
Siring man na pag-isipon pirme an kaligtasan kan sadiri asin kan mga pasahero.
