17 electric coop sa Phl, pigpapakanselar kan DOE sa Kamara an prangkisa

LEGAZPI CITY- Kinontra kan nagkapirang opisyal kan Albay Electric Cooperative Inc. (ALECO) interim board an impormasyon dapit sa surat kan Department of Energy (DOE) sa Kamara na obhetong kanselaron an prangkisa kan 17 electric cooperatives sa nacion, kaibanan an nasabing kooperatiba.

Napag-araman na sa surat na ipinadara ni Energy Secretary Alfonso Cusi kay House Speaker Gloria Macapagal Arroyo, hinagad kaini an pagkanselar kan prangkisa kan nasabing mga kooperatiba huli sa suboot underperformance asin bako magayon na sitwasyon kan estadong pinansyal, susog sa rekomendasyon kan National Electrification Administration (NEA).

Sa intrevista kan Bombo Radyo Legazpi ki Atty. Bart Rayco, board president kan ALECO, dapat suboot na mas malinawan pa an grounds of cancellation kan prangkisa.

Dawa pa dae na maikokonsiderar na “ailing” o may helang kundi “dying” na an ALECO alagad posibleng mas nagin marhay suboot an operasyon kun natabangan kan NEA na trabaho man kan mga ini.

Siring man, ipigduon ni Rayco na kapalpakan man kan NEA an nangyari huli ta imbes suboot na magiyahan sa dapat na gibuhon, garing nag-give up na a n ahensya.

Sa ibong na lado, pag-aadalan na man kan ALECO an magigin simbag sa naresibeng kopya kan surat.

Nagda-draft na man suboot kan rekomendasyon an DOE sa pag-adopt kan Kongreso sa pagpili sa igagawad na prangkisa sa mga posibleng aplikante.

Napag-araman na nagbadol sa P4 billion an utang kan ALECO sa pagpapadalagan kan kooperatiba antes na maipasa an operasyon sa presenteng nagkakapot na pribadong Albay Power and Energy Corporation (APEC).

Afuere sa ALECO, kaibanan man na ipinapakanselar an prangkisa kan Abra Electric Cooperative (ABRECO); Pampanga III Electric Cooperative, Inc. (PELCO III); Occidental Mindoro Electric Cooperative, Inc. (ORMECO); Palawan Electric Cooperative, Inc. (PALECO); Camarines Sur III Electric Cooperative, Inc. (CASURECO III); Masbate Electric Cooperative, Inc. (MASELCO); First Catanduanes Electric Cooperative, Inc. (FICELCO) asin Ticao Island Electric Cooperative, Inc. (TISELCO).

Magin an Zamboanga City Electric Cooperative, Inc. (ZAMCELCO); Davao del Norte Electric Cooperative, Inc. (DANELCO); Basilan Electric Cooperative, Inc. (BASELCO); Sulu Electric Cooperative, Inc. (SULECO); Tawi-Tawi Electric Cooperative, Inc. (TAWELCO); Maguindanao Electric Cooperative, Inc. (MAGELCO) at Lanao del Sur Electric Cooperative, Inc. (LASURECO) an kaibanan man sa nasabing listahan.