LEGAZPI CITY — Intensyon talaga suboot kan 17 anyos na daraga na maghugot huli sa nakuang suicide notes sa laog kan banyo sa residencia kaini sa Barangay Mauraro sa banwaan kan Guinobatan, Albay.
Sa intrevista ki PC/Insp. Jason Rey Colico, hepe kan Guinobatan Municipal Police, an mismong stepfather kan biktima an nakahiling sa hawak kaini na nakabigti sa laog kan saindang banyo.
Sa istorya kan amaon, labi trenta minutos suboot an aki sa banyo kun kaya tinuktukan na niya ini alagad warang nagsisimbag kaya pwersahan nang binuksan an pinto asin tuminambara an nakabigting hawak kan aki.
Tulos man na naghagad nin tabang an amaon asin pinutol an bugkos ngane na idalagan sa ospital alagad idineklarar na ining dead on arrival.
Base sa imbestigasyon, may iwinalat na duwang suicide note an biktima para sa ina asin ilusyon kaini.
Segun digdi, dae na niya kaya an pagpirit kan saiyang ina na magpadagos pa sa pagklase.
Pigpipirot suboot kaya an aki sa klase asin mawot na sanang magtrabaho.
Nagpaaram man an biktima sa ilusyon kaini na dae maghadit asin ginibo an nasabing bagay huli sa nadidifisilan na sa sitwasyon.
Antes an nasabing insidente, nagkaigwa suboot nin dae pagkakasinabutan an mag-ina na naging rason kan paghugot kan daraga.
