LEGAZPI CITY – Arestado an sarong menor de edad makalihis na i-subject kan mga operatiba sa anti-drug operation sa ciudad kan Tabaco, alas-2:10 kasuodmang hapon, Oktubre 23.
Inaprehender an 16-anyos na solterito makalihis na maberipikar an pagpapabakal kaini kan pigtutubudang shabu sa otoridad na nagpabistong buyer.
Nangyari an transaksyon sa Purok 3 kan Brgy. Baranghawon kan nasabing ciudad.
Sa nagunong impormasyon kan Bombo Radyo Legazpi hali sa Albay Police Provincial Office, nakumpiskar pa sa nasabing solterito an sarong medium-sized plastic sachet kan pigtutubudang shabu na may market value na P7, 500.
Nakatalaan naman na sunadan nin kasong pagbayolar sa Acta Republika Numerado 9165 o Comprehensive Dangerous Drugs Act of 2002.
Mientras na pig-aaram pa an posibleng supplier o pigkukuhaan kaini kan mga ipigpapabakal na iligal na droga.
Kun babalikan, ngonian na semana kan ikasa an one time, big time operation sa duwang barangay pa sa nasabing ciudad sa pangengenotan kan Philippine Drug Enforcement Agency (PDEA).
Nagresulta ini sa pagkakaarestar kan 12 katawo asin pagkabuwag kan duwang drug dens mantang nakumpiskar man an maabot sa P1 million na kantidad kan pigtutubudang shabu.
