LEGAZPI CITY – Nadugangan pa nin 15 an kaso kan COVID-19 sa Bicol.
Huli digdi nagsakat na sa 1,642 an kabilugang kaso kun sain nasa 489 an aktibong kaso, susog sa datos na ipinaluwas kan Department of Health Center for Health and Development (DOH-CHD) Bicol.
Apat na panibagong kaso an hali sa ciudad kan Legazpi; pito sa Camarines Sur; saro sa Virac, Catanduanes; saro sa ciudad kan Masbate asin duwa sa Pilar, Sorsogon.
Wara man na nairehistrong panibagong kaso sa Camarines Norte.
Anom man an nairehistrong panibagong recoveries kaya nagsakat na sa 1, 095 an total recoveries mantang mantenido sa 58 an mga nagadan sa COVID-19.
Mientras tanto, nasa 347 an kabilugang test results na ibinaba kun sain nasa 330 an nagnegatibo sa nasabing helang.
