LEGAZPI CITY — Padagos pang pigbibisto kan Ligao City Police an saro sa 15 katawo na nahiling sa CCTV na suspek sa pananaksak asin pambubungag sa Barangay Tuburan, sa ciudad kan Ligao, Albay.
Segun ki C/Insp. Arthur Gomez, tagapagtaram kan Albay Police Provincial Office, nagsapar nin saksak hale sa screwdriver an biktimang si Michael Aranda, na tubong Laguna na presenteng nakaistar sa lugar mantang puro bungag an sinapar kan tulong iba pa na sinda Roy Monsalez, Daniel Guimary asin Jonas Amil na residente man kan ciudad.
Base sa imbestigasyon kan mga otoridad, hale sa lamay kan saindang amigo an apat kan biglang sundan ini kan nasa 15 kalalakihan asin saka nang-atake.
An nasabing mga kalalakihan an hale man sa lamay na nag-okupa nin duwang lamesa asin nag-inuman alagad segun sa parientes kan gadan, dae ninda bisto an mga nasabing tawo na haros kaedad sana kan mga biktima.
Blangko pa an pulisya sa motibo sa insidente alagad naglalaom an mga ini na maaraman ini oras na madakop an saro sa mga suspek na nahiling sa CCTV asin posibleng magtuga man suboot ini asin ikanta an iba pang kairiba.
Dakula man an pasalamat ni Gomez huli sa dakulang tabang suboot sa imbestigasyon kan pulisya an pagkakaigwa nin CCTV sa lugar ngane na mabisto an suspek asin madakop ini.
Sa ngonian, padagos an paghahanap sa saro sa mga suspek na nabisto man suboot kan mga biktima ngane na madakop man an kairiba kaini asin masangat na nin reklamo.
