LEGAZPI CITY – Nag-negatibo sa anggulo kan rape an kaso kan sarong 15-anyos na joven na nadukayang gadan sa laog kan banyo kan sarong lodging house sa syudad kan Ligao.
Sa intrevista kan Bombo Radyo Legazpi ki PCI Arthur Gomez, an tagapagtaram kan Police Regional Office 5, pighayag kaini na nagluluwas sa otopsiya kan hawak kan menor de edad na biktima na strangulation o pagtungok an ikinagadan kaini.
Sa presente nagpapadagos pa man suboot an imbestigasyon na ipigkokundusir kan mga personahes kan Ligao CPS ngani na makua pa nin dakol na impormasyon dapit sa insidente.
Pighayag man kan opisyal na igwa na sinda ngunyan na pigbabantayan na suspek sa tabang na man mga witness na saindang nakakaolay.
Segun ki Gomez, sa ngunyan dae pa nakakapag-file nin kaso an mga otoridad huli ta dae pa kaini nakukuwa an tunay na pangaran kan suspetsado asin pighahalat pa an affidavit kan mga testigo.
Dae pa suboot masiyerto kun pira an suspek sa krimen huli ta duwang persona an nagsabat sa biktima gamit an sarong motor na warang plate number makalihis ining mag-atendir sa sarong aktibidad.
Mientrastanto, inako man kan opisyal na dati nang trabaho kan suspek sa krimen an maghanap nin mga mabibiktima na menor de edad asin babayadan ini ngani na kuwaan nin video ngani na maipabakal.
Sa ngunyan hagad ni Gomez na magpadagos an pakikipagtabangan kan mga witness para sa tulos na pagkaka resolbar kan krimen.
