Nakabalik na sa nasyon an 13 bados na pinay na nakulong sa Cambodia nin huli sa ilegal na pagigin surrogate mothers kan mga ini sa naunambitang nasyon.
Segun sa iniluwas na pahayag kan Department of Foreign Affairs (DFA), napatawan nin padusa an 13 filipina kan December 2 nin huli sa pagbalgar sa Suppression of Human Trafficking na ley kan Cambodia.
Huli sa padagos na effort asin pakikipagkoordinar kan ahensya an natawan nin pardon an mga ini asin tulos na pinalaya para sa saindang immidiate repatriation.
Nagpasalamat man an DFA sa padangog asin paggawad nin pardon ni Haring Preah Bat Samdech Preah Boromneath Norodom Sihamoni sa 13 pinay.
Mientrastanto, nagpaabot man nin tabang o humanitarian treatment an royal government kan Cambodia nganing ibahan an mga filipina sa proseso kan saindang mga kaso.
Bako ini an enot na bes na nagkaigwa nin siring kaining insidente na may kinaaraman sa iligal na surrogacy na kinababalehan kan mga pinay an naitala kan DFA.
Padagos man an ahensya sa pagpapagirumdom na may mga nasyon partikular na an Cambodia kun saen banned an surrogacy asin an sisay mang mabayolar an mapapadusahan sa irarom kan Cambodian law.
