LEGAZPI CITY — Idinalagan sa ospital an 13 katawo makalihis maaksidente an piglulunadang tricycle sa tinampong sakop kan Brgy. Buhatan, sa banwaan kan Sto. Domingo, Albay.
Sa intrevista kan Bombo Radyo Legazpi ki Pol. S/Insp. Genevieve Oserin, hepe kan Sto. Domingo Municipal Police, napag-araman na lunad kaini an limang estudyante hale sa Bical National High School siring man an walong iba pa kan mangyari an aksidente.
Sa pag-abot kan behikulo sa pababang porsyon kan tinampo, nawaran nin kontrol sa manibela an drayber na binistnong si Ronald Ibarra, 48-anyos kan dae magkagat an preno, rason tangarig na magdire-diretso man an tricycle.
Katakod kaini, nagsapar nin lugad sa manlaen-laen na parte kan lawas an mga pasahero na tulos man na nakaluwas sa ospital makalihis na matawanan nin magkakanigong tratamentong medikal.
Pighihiling na mayor na rason kan aksidente an overloading kaya tinawang-duon kan hepe na anom sana an capacity kan tricycle mantang ipigduon an pagsunod sa mga ipigpapaotob na traffic rules.
Mientras tanto, nakatalaan na liwat na maghampang an drayber asin an mga naaksidenteng pasahero tangarig na pag-olayan an magkakanigong lakdang dapit sa pangyayari.
