LEGAZPI CITY-Nadakop sa ikinasang 24 oras na operasyon kan kapulisan kan Sorsogon provincial police an nasa 13 indibidwal poon kan Setyembre 11 hasta 12.
Segun ki Sorsogon Police Provincial Office Spokesperson Police Lieutenant Colonel Arwin Destacamento , sa intrevista kan Bombo Radyo Legazpi, na parte ini kan saindang mas pinahigot na kampanya laban sa mga wanted na personahes.
Epektibo suboot ini sa paagi kan halangkaw na kooperasyon kan mga namamanwaan asin bilang suporta ninda sa programa kan saindang himpilan.
Katuwang ninda sa mga operasyon an mga komunidad asin mga law enforcement agency, ngani mapanimbag an mga igwang warrant of arrest asin igwang kaso na nagtatago sa ley.
Kadaklan suboot na mga nadadakop, mga nagtatago nin haros sarong taon pataas asin igwang mga isingat na kaso, kabali an rape, murder, asin iba pa.
Nagin matrayumpo ini sa pakikipagtabangan kan ibang mga ahensya asin rehiyson, kun sain mas madali na suboot an paghahanap sa mga wanted na indibidwal kumparar kan mga nakaaging panahon
