LEGAZPI CITY-Magtatalaga asin ipapakalat sa bilog na nacion kan Philippine National Police (PNP) an maabot sa 11,949 na kapulisan para sa seguridad sa mismong aldaw kan State of the Nation Address (SONA) ni President Ferdinand Marcos Jr. sa maabot na Hulyo 28.
Sa sarong pulong balitaan sa Kampo Krame, kinumpirma ni PNP Spokesperson Police Brigader General Jean Fajarado na nagpaapod nin sarong command conference an hepe kan Pambansang Pulisya na siyang inatendiran kan mga regional directors partikular na an regional director hale sa National Capital Region Police Office (NCRPO) ngani pagorolayan an magigin deployment sa aldaw kan SONA kan Presidente.
Pagkatapos kaini magsasagibo nin sarong coordinating conference an PNP kairiba an panig kan Office of the Sergeant-at-Arms kan House of Representatives ngani maplantsa na an nagkapirang mga security protocols na ipapaotob sa laog o luwas man kan Batasan.
Kasunod kaini, ipapaotob man an Manila Shield kung sain magtatao nin dagdag na tabang an mga kapulisan hale sa Police Regional Office III asin Police Regional Office 4A ngani bantayan asin ipaotob an border controls sa hangganan kan nacion.
