LEGAZPI CITY — Nagpapadagos an ipigkokundusir na imbestigasyon kan mga otoridad dapit sa pagkagadan kan sarong 12-anyos na daragita sa Barangay San Juan banwaan kan Sto. Domingo, Albay.
Sa intrevista kan Bombo Radyo Legazpi ki Police S/Insp. Genevieve Oserin, hepe kan Sto. Domingo Municipal Police, binisto an biktima na si Angel Rodriguez.
Segun sa hepe, nasa Manila an totoong magurang kan biktima asin nagtetenir sana ini sa lola na uminampon digdi o sa mga kaparientes asin maski sain-sain suboot ini nagduduman na dae nagpapaaram.
Nagluluwas sa inisyal na imbestigasyon na nagkaon pa an biktima sa harong kan guardian kaini na nabistong si Jennifer alas-8 nin banggi kasuodma asin nahiling pa sa merkado kasubagong alas-3 nin maagahon kaya blangko pa sa ngunyan sa motibo sa krimen.
Pagbuyagyag pa kan opisyal, may mga pasa sa pandok, likod asin sa liog an biktima na indikasyon na tinuok ini na pinagtutubudan na rason kan kagadanan.
Sa presente, padagos na pig-aaram kan kapulisan an posibilidad na linugusan an biktima huli ta nakasulot pa man ini nin bado kan madukayan sa sarong kubo sa nasambitan na barangay.
Posible man na itinapok sana sa lugar an daragita huli ta imposible suboot na dae madangog kan mga kataid na harong kun duman ginadan an nasambitan na menor de edad.
Mientras tanto, blangko pa an Sto. Domingo PNP kun siisay an posibleng may kagigibuhan kan krimen kaya padagos pa an pagtitipon nin ebidensya para sa ikakaarestar kan suspek.
