LEGAZPI CITY- Inasegurar kan National Food Authority (NFA) Bicol na 100% munang libre sa nadiskubreng red-rust beetles o bukbok antes na ibaba an labi sa 100, 000 rice bags sa barkong nakadaong sa Tabaco City Port kan Albay.
Magigirumduman na isinairarom an mga ini sa fumigation process puon pa kaitong Agosto 19 sa tabang kan Bureau of Plant Quarantine asin surveyor kan barko kan Thailand.
Sa intrevista kan Bombo Radyo Legazpi ki NFA Bicol Acting Regional Director Yolanda Navarro, piglalaomang Agosto 31 an pagdadagos kan pag-unload sa nasa 177, 000 bags pa kan imported rice.
Dae man kaya pwedeng idiskarga an bagas asin ikaag sa bodega urog na mas magigin paborable an temperatura kaini sa pagdakol man kan insekto.
Mientras tanto, nagluluwas sa initial analysis na posibleng nagkaigwa nin leak sa barko kaya binukbok an bagas mantang inako na man kan Thailand an gastos sa ipigsasagibong fumigation.
Hinale pa ni Navarro an paghadit kan nagkapirang parabakal sa pagsasabing salbado ang kemikal na ginamit sa proseso kan paggadan sa mga insekto mantang aprubado man kan Food and Drug Administration (FDA).
