LEGAZPI CITY- Nagsakat pa sa sampulong mga violators an nasunadan nin reklamo sa Legazpi City Prosecutors Office huli sa saindang bayolasyon sa paninigarilyo asin paggamit nin vape sa pampublikong lugar.
Napag-araman na an nasabing mga persona an dae nag-settle sa citation ticket na saindang naresibe.
Segun ki Legazpi Smoke Free Unit chief Jose Balbin sa intrevista kan Bombo Radyo Legazpi na tinawan nin haros sarong bulan an nasabing mga violators ngani na makapag settle sa saindang bayolasyon alagad ipinasipara sana ini.
Marurumduman na sa irarom kan ordinansa kan ciudad, dapat na sa laog nin 24 oras makapag settle an violators alagad nagtao na suboot an ahensya nin halawig na panahon huli ta nasasabutan man ninda an kadifisilan sa paghahanap nin kwarta.
Segun pa sa opisyal na an simpleng dae pag-settle kan saindang bayolasyon an magreresulta sa pagkakaigwa nin criminal case record na makaka apektar sa saindang datos sa police clearance asin NBI Clearance.
Nangangahulugan ini na maski an pagkuwa nin trabaho sa futuro an maaapektaran huli sa dae pagsunod sa ordinansa kan ciudad.
Dugang pa kan opisyal na kinakaipuhan na masabutan kan publiko na matindi an epekto kan saindang paninigarilyo sa salud kan mga tawo na nakapalibot sa sainda.
