LEGAZPI CITY — Sarong miembro kan pigtutubudan na rebeldeng New People’s Army an kumpirmadong gadan sa panibagong enkwentro na nangyari sa Barangay San Carlos, banwaan kan Milagros, Masbate.
Sa impormasyon na naguno kan Bombo Radyo Legazpi, napag-araman na pasiring sa lugar an mga miyembro kan 2nd Infantry Battalion kaibanan an 96 Military Intelligence Company (MICO) asin 22 Infantry Battalion kan makasagupa kaini an pigkakarkulong nasa poco mas o menos limang rebelde.
Naghaloy an ribayan nin putok nin hasta sa limang minuto na nagresulta sa pagkagadan kan dae pa nabibistong rebelde mientras na narekober an sarong improvised shotgun.
Katakod kaini, sarong team an iwinalat sa lugar na pinangyarihan kan engkwentro ngani na ma-secure an mga ebidensya.
Mientras tanto, nagpapadagos man ngonian an ipigkokundusir na imbestigasyon kan mga personahes kan Milagros Municipal Police katakod kan nasambitan na insidente.
