LEGAZPI CITY- Padagos na pig-aaram ngunyan kan mga otoridad an pagkakabisto kan pinagtutubudan na miyembro kan rebeldeng New People’s Army (NPA) na nagadan sa nangyaring engkwentro sa Barangay San Antonio, Milagros, Masbate.
Sa intrevista kan Bombo Radyo Legazpi kay 9th ID spokesperson Col. Paul Regencia, nagkokundusir nin combat patrol operations an mga sulsados sa pangengenot ni 2Lt. Cielo Rose Dolorican kan makasagupa kaini an pigkakarkulong nasa sampulong mga rebelde.
Masuwerte man na warang nakulugan o nagadan sa lado kan gobierno.
Segun sa opisyal, iwinalat na kan mga pag-iriba kaini an dae pa nabibistong rebelde makalihis an ribayan nin putok kun sain narekober pa an sarong unit nin M14 rifle, sarong M653 rifle, duwang improvised explosive devise (IED) asin supersibong mga dokumento.
Dugang pa ni Regencia na an nasambitan na mga high powered firearms an indikasyon na kaibanan an mga suspek sa regular unit kan NPA.
Napag-araman na nagpapadagos ngunyan an security operations kan militar sa provincia puon pa kan Enero katakod kan direktiba kan Commission on Elections (Comelec) na mas pahiguton an pagbabantay sa mga lugar na posibleng mapabali sa election hotspots.
Mientras tanto, sa ibong kan nasambitan na enkwentro, sinierto ni Regencia na warang dapat ikahadit an publiko huli ta nagbilog na nin task force an PNP asin AFP siring man an pagdedesignar nin mga senior officers na mabantay sa mga gigibuhong security measures para sa paparaning pirilian.
