LEGAZPI CITY — Dae na naisalbar pa an buhay kan sarong motorista makalihis na maaksidente an piglulunadan na motorsiklo sa kalabaan kan National Road kan Barangay Tabi, Gubat, probinsya kan Sorsogon.
Segun sa impormasyon na ipinaabot kan Gubat Municipal Police, pigbabaybay kan tricycle na pigmamanehar ni Roberto Erevira an tinampo pasiring sa banwaan kan Gubat hali sa Barangay Tugawe mantang an biktima man na si Jayson Jamolin an pasiring man sa parehong banwaan.
Alagad pag-abot kan duwa sa barangay Tabi, aksidente ining nagkabanggaan rason ngani na magsapar nin injuries si Jamolin.
Tulos man ining idinalagan sa ospital alagad idineklarar na dead on arrival.
Nagluluwas man sa imbestigasyon kan mga otoridad na warang sulot na helmet an biktima kan mangyari an aksidente asin dae suboot kaini pighihiling an dalan.
Napag-araman man na nasa irarom si Jamolin nin impluwensya nin arak.
Sa presente nagpapadagos pa an ipigsasagibong imbestigasyon kan mga kapulisan dapit sa nasambitan na aksidente mantang nasa kustodiya na kan Gubat PNP an mga imbweltong behikulo para sa magkakanigong disposisyon.
