LEGAZPI CITY- Nagpaparahay na ngunyan sa ospital an tulong katawo makalihis an nangyaring aksidente sa kalabaan kan Purok 1 Brgy. Tabon-Tabon, banwaan kan Daraga, Albay.
Sa inisyal na imbestigasyon kan Daraga PNP, napag-araman na pigbabaybay kan sarong tricycle an tinampo pasiring sa direksyon kan Sorsogon kan aksidenteng buminangga ini sa kasunod na bus rason ngani na mahulog ini sa sarong kanal.
Lugadan an drayber kan Tricycle na binistong si Tirso Malejana, 45 anyos kaibanan an aki kaining sinda Myra Malejana, 18 anyos asin Mary Grace Malejana, 21 anyos na residente kan nasambitan na barangay na tulos man na naidalagan sa ospital.
Mientrastanto, dae na uminabot nin buhay sa ospital an agom kaining si Vivian Malejana, 42 anyos asin idineklarar na dead on arrival makalihis na magsapar nin kritikal na tama huli sa nasambitan na insidente.
Sa presente nagpapadagos pa a inventory kan kapulisan sa posibleng kantidad kan danyos sa nasambitan na banggaan.
