LEGAZPI CITY — Gadan an sarong 52 anyos na babaye makalihis na pagbabadilon kan duwang dae pa nabibistong suspetsado na pigtutubudang miyembro kan komunistang grupo sa Brgy. Balocawe banwaan kan Matnog, Sorsogon.
Sa nagunong impormasyon kan Bombo Radyo Legazpi, napag-aramang naglalakaw an biktimang si Carmen Nieva kan biglang ranihan kan duwang armadong kalalakihan asin pinagbabadil nin limang beses sa manlaen-laen na parte kan saiyang hawak na nagresulta sa tulos na pagkagadan kaini.
Tulos man na nagdulag sa mabulod na parte kan nasabing barangay an mga suspek makalihis an nasabing insidente.
Narekober man kan nagrespondeng personahes kan Matnog Municipal Police an apat na fired cartrigdes, sarong deformed slug asin an sarong puting sako.
Nakasurat pa sa nasabing sako an mga tataramon na aktibong asset kan militar an biktima kun kaya pinadusahan nin kagadanan.
Huli sa nasabing ebidensya, pigtutubudan kan mga pulis na miyembro an mga ini kan CNN.
Sa ngunyan, padagos an pigkokondusir na operasyon kan mga otoridad asin idineploy na an intelligence operatives para sa pursuit operation kontra sa mga nagdulag na suspetsado.
